साउन ९, काठमाडौँ । नेपालमा आज ५६८ जनामा कोरोना संक्रमण पुष्टि भएको छ । पछिल्लो २४ घन्टामा देशभर ३ हजार ८४ जनाको पीसीआर परीक्षणमा ४५३ जना र १ हजार ७१६ जनाको एन्टीजेन परीक्षणमा ११५ जना गरी ५६८ जनामा संक्रमण पुष्टि भएको हो ।
त्यस्तै पछिल्लो २४ घन्टामा थप ९५ जना संक्रमित निको हुँदा हालसम्म नेपालमा ९ लाख ६८ हजार ५८४ जना निको भएका छन् । यो कुल संक्रमितको ९८ दशमलव ४ प्रतिशत हो ।
यसैबीच नेपालमा पछिल्लो २४ घन्टामा थप एकजना कोरोना संक्रमितको मृत्यु भएको छ । योसँगै कोरोनाले ज्यान गुमाउनेको सङ्ख्या ११ हजार ९५७ पुगेको छ ।
स्वास्थ्य तथा जनसङ्ख्या मन्त्रालयका अनुसार हाल नेपालमा ३ हजार ५३४ जना सक्रिय संक्रमित रहेका छन् । पछिल्लो २४ घन्टामा थप ६३ हजार ३७२ जनाले कोरोनाविरुद्धको खोप लगाएका छन् ।
