चैत २, काठमाडाैँ । प्रभु बैंकमार्फत मुक्तिनाथ मन्दिरमा भीम युपिआई सेवा शुभारम्भः डिजिटल भुक्तानी र क्रस–बोर्डर कारोबारमा नयाँ युगको सुरुवात भएको छ । मुस्ताङ जिल्लाको प्रसिद्ध धार्मिक स्थल मुक्तिनाथ मन्दिर परिसरमा शुक्रबार एक विशेष समारोहका बीच नेपाल राष्ट्र बैंकका गभर्नर श्री महाप्रसाद अधिकारी ज्यूको प्रमुख आतिथ्यतामा भीम युपि आई (BHIM UPI) सेवा शुभारम्भ गरिएको हो ।
उक्त सेवाको सुरुवातसँगै अब भारतका नागरिकहरुले आफ्नो बैंक खाताबाट भीम युपि आईआर्फत क्युआर स्क्यान गरी मुक्तिनाथ मन्दिरमा भेटी, दान, दक्षिणा तथा अन्य भुक्तानी गर्न सक्ने भएका छन् । यसले मुक्तिनाथ मन्दिरमा आउने भारतीय भक्तजनहरुलाई डिजिटल माध्यमबाट सरल, सुरक्षित र सहज भुक्तानी गर्ने सुविधा प्रदान गर्नुका साथै नेपाल–भारत वित्तीय सम्बन्धलाई थप सुदृढ बनाउने विश्वास गरिएको छ । साथै, यो सेवा क्रस–बोर्डर (सीमापार) डिजिटल भुक्तानीलाई प्रोत्साहन गर्ने महत्वपूर्ण प्रयास भएको छ, जसले भारत र नेपालको वित्तीय सहकार्यलाई नयाँ उचाइँमा पुर्याउने अपेक्षा गरिएको छ ।
विशेष समारोहमा नेपाल राष्ट्र बैंकका कार्यकारी निर्देशक श्री गुणाकर भट्ट, नेपाल राष्ट्र बैंकका निर्देशक श्री मुक्ति सापकोटा, नेपाल राष्ट्र बैंक पोखरा प्रादेशिक कार्यालयका प्रमुख श्री दीपक राज लामिछाने, प्रभु बैंक गण्डकी प्रदेश प्रमुख श्री राजु राना मगर, स्थानीय प्रशासन, मन्दिर व्यवस्थापन समिति, धार्मिक गुरुहरु, बैंकका उच्च पदाधिकारी तथा अन्य विशिष्ट व्यक्तिहरुको उपस्थिति रहेको थियो ।
नेपाल राष्ट्र बैंकका गभर्नर श्री महाप्रसाद अधिकारीज्यूले भीम युपिआई सेवाको शुभारम्भले डिजिटल भुक्तानी प्रणालीलाई प्रवद्र्धन गर्दै वित्तीय समावेशनलाई बलियो बनाउने उल्लेख गर्नुभयो । उहाँले भक्तजनहरुका लागि यो प्रविधि सुरक्षित, पारदर्शी र सरल हुने विश्वास व्यक्त गर्दै डिजिटल भुक्तानीलाई सर्वसुलभ बनाउन विभिन्न सचेतना कार्यक्रमहरु सञ्चालन गर्नुपर्ने आवश्यकता औल्याउनु भयो ।
गभर्नर अधिकारीज्यूले नेपाल राष्ट्र बैंक ‘डिजिटल नेपाल’ अभियानलाई प्राथमिकता दिँदै आएको र यस्ता नविनतम प्रविधिहरुको प्रवद्र्धनमा निरन्तर प्रतिबद्ध रहेको बताउनु भयो । उहाँले डिजिटल भुक्तानी प्रविधिलाई नेपालभर सर्वसुलभ बनाउने तथा वित्तीय पहुँचलाई विस्तार गर्ने दिशामा राष्ट्र बैंकले आवश्यक नीति तथा कार्यक्रमहरु अघि बढाउने उल्लेख गर्नुभयो ।
यस अवसरमा प्रभु बैंकका प्रतिनिधिहरुले बैंक प्रविधिमा निरन्तर अग्रसर रहेको जानकारी गराउँदै बैंकले देशभर ७७ वटै जिल्लामा ३१२ शाखा तथा ६७ एक्सटेन्सन काउन्टरमार्फत सेवा प्रदान गरिरहेको र देश–विदेशमा उत्कृष्ट रेमिटेन्स सेवा उपलब्ध गराउँदै आएको बताए ।
नेपाल राष्ट्र बैंकका भगर्नर, कार्यकारी निर्देशक, निर्देशक, बैंकका प्रतिनिधिहरु तथा अन्य विशिष्ट व्यक्तिहरुले भीम युपिआई सेवाको शुभारम्भ मुक्तिनाथ क्षेत्रका लागि महत्वपूर्ण उपलब्घि भएको बताउँदै नेपालमा डिजिटल वित्तीय सेवा विस्तारको दिशामा यो अर्को महत्वपूर्ण कदम हुने उल्लेख गरे । अव भक्तजनहरुले मुक्तिनाथ मन्दिरमा डिजिटल भुक्तानीको सहज सुविधा अनुभव गर्न सक्नेछन् ।
