कात्तिक १६, नवलपरासी । क्रान्तिकारी कम्युनिस्ट पार्टी नेपाल जिल्ला समिति नवलपरासीले स्वाधीन संयुक्त सरकारको आवश्यकता माथि जोड दिएको छ । वर्तमान सरकारलाई जेन-जी बिद्रोह भजाएर बनेको कठपुतली सरकार भन्दै यस सरकारले देशलाई निकास दिन नसक्ने पार्टीले दावी गरेको हो ।
‘देशभक्त, गणतन्त्रवादी, क्रान्तिकारी जनवादी तथा वामपन्थी शक्तिका बीच संयुक्त मोर्चा निर्माण गरी स्वाधीन संयुक्त सरकारको पक्षमा सङ्घर्ष उठाउन पहल गर्ने योजना छ’ – पार्टीका केन्द्रीय सदस्य तथा नवलपरासी जिल्ला इन्चार्ज क्षेत्रबहादुर थापाले भने ‘ देशको सार्वभौमिकताको पक्षमा सशक्त आवाज उठाउँदै राष्ट्रिय स्वाधीनता माथिको खतराका विरुद्ध एकल तथा संयुक्त सङ्घर्ष उठाउन जोड दिने भएका छौं ।’
शनिवार सो पार्टीको बर्दघाट–१४ गंगाबस्ती जिल्ला सचिवालयको विस्तारित बैठक भएको थियो । बैठकले भ्रष्टहरुको भण्डाफोर तथा कारवाही गर्दै भ्रष्टाचार विरोधी सङ्घर्षलाई अगाडि बढाउने निर्णय गरेको क्रान्तिकारी कम्युनिस्ट पार्टी नेपालका बैकल्पिक केन्द्रीय सदस्य तथा जिल्ला सेक्रेटरी रवि पाण्डेयले जानकारी दिए । ‘स्थानीय समस्यालाई लिएर सिर्जनात्मक ढंगले स्थानीय वर्गसङ्घर्ष उठाउन जोड दिईनेछ ।’ – युवा नेता पाण्डेयले भने– ‘जसमा जुझारु सङ्घर्ष उठाउन पहल लिइनेछ ।’
कार्यक्रममा पार्टीका सचिवालय सदस्यत्रय गणेशबहादुर ढकाल, दुर्गा नारायण चौधरी, राम प्रसाद अर्गेजा र क्रान्तिकारी संयुक्त मोर्चा नेपाल नवलपरासीका संयोजक चुडामणी भण्डारीले आन्दोलन उठान गर्न सुझाव सहित बिषयबस्तु राखेका थिए ।
क्रान्तिकारी संयुक्त मोर्चा नेपाल क्राकपा नेपालको रणनैतिक मोर्चा हो ।
