चैत १७, काठमाडौँ । प्रधानमन्त्री केपी शर्मा ओलीले सर्वदलीय बैठक बोलाएका छन् । प्रधानमन्त्री केपी शर्मा ओलीले पछिल्लो राजनीतिक घटनाक्रम र तीनकुने घटनाबारे छलफल गर्न आइतबार साँझ ७ बजे सिंहदरबारमा बस्ने गरी सर्वदलीय बैठक बोलाएका हुन् ।
नेकपा (एमाले) का प्रमुख सचेतक महेश बर्तौलाका अनुसार सभामुख देवराज घिमिरेको आह्वानमा बसेको प्रमुख सचेतकहरूको बैठकमा प्रधानमन्त्री ओलीले सर्वदलीय बैठकबारे जानकारी गराएका हुन् ।
शुक्रबार काठमाडौँको तीनकुनेमा भएको हिंसात्मक प्रदर्शनका क्रममा दुई जनाको मृत्यु भएपछि उत्पन्न परिस्थितिबारे छलफल गर्न यो बैठक बोलाइएको हो। साथै, प्रमुख विपक्षी दलहरूले उठाएका मागहरूमाथि सरकारको धारणा स्पष्ट पार्ने उद्देश्य बैठकको रहेको बताइएको छ ।
सभामुख देवराज घिमिरेका अनुसार संसद् अवरोध खुलाउने विषयमा प्रधानमन्त्री ओली र विपक्षी दलका नेताबीच टेलिफोन संवाद भएको थियो । बैठकमा सत्तापक्षले संसद् सुचारु गर्न आग्रह गरे पनि विपक्षीहरूले आफ्नो अडान कायम राखेका छन् ।
