चैत १७, काठमाडौँ । काठमाडौँ महानगरपालिकाले पूर्वराजा ज्ञानेन्द्र शाहलाई झण्डै आठ लाख रुपैयाँ जरिवाना तोकेको छ । महानगरपालिकाले चैत १५ (शुक्रबार) तीनकुनेमा आयोजना गरिएको कार्यक्रममा सार्वजनिक सम्पत्तिमा क्षति पुर्यायको भन्दै विभिन्न ९ वटा शीर्षकमा ८ वटा पत्र लेखेर ज्ञानेन्द्रलाई सात लाख ९३ हजार रुपैयाँ जरिवाना तोकेको हो ।
महानगरले पूर्वराजा ज्ञानेन्द्र शाहको नाममा पत्र लेख्दै जरिवाना तोकेको छ । शुक्रबार तीनकुनेमा भएको हिंसात्मक आन्दोलनको क्रममा महानगरको दमकलसहित अन्य विभिन्न भौतिक संरचनामा क्षति पुगेको थियो । सोही आन्दोलनको क्रममा दुई जनाको ज्यान गएको थियो भने दर्जनौं घाइते भएका थिए ।
प्रदर्शनकारीको उग्र व्यवहारका कारण दिनभर काठमाडौंको तीनकुने क्षेत्र तनावग्रस्त बनेको थियो । यसअघि पनि पूर्वराजा शाहलाई भव्य स्वागत गर्ने क्रममा सडकमा फोहोर गरेको भन्दै काठमाडौँ महानगरपालिकाले राष्ट्रिय प्रजातन्त्र पार्टी (राप्रपा) लाई १ लाख रुपैयाँ जरिवाना गरिसकेको थियो ।
जरिवानाका शीर्षक निम्नानुसार छन् :
१) कोटेश्वर क्षेत्रको सडक तथा सडकपेटीमा जथाभावी फोहोरमैला गरेको – १ लाख रुपैयाँ
२) महादेवस्थान क्षेत्रको सडक तथा सडकपेटीमा जथाभावी फोहोरमैला गरेको – १ लाख रुपैयाँ
३) तीनकुने क्षेत्रको सडक तथा सडकपेटीमा जथाभावी फोहोरमैला गरेको – १ लाख रुपैयाँ
४) जडीबुटी क्षेत्रको सडक तथा सडकपेटीमा जथाभावी फोहोरमैला गरेको – १ लाख रुपैयाँ
५) बालकुमारी क्षेत्रको सडक तथा सडकपेटीमा जथाभावी फोहोरमैला गरेको – १ लाख रुपैयाँ
६) सिनामंगल क्षेत्रको सडक तथा सडकपेटीमा जथाभावी फोहोरमैला गरेको – १ लाख रुपैयाँ
७) महानगरको दमकल फुटाएको – १ लाख ३० हजार रुपैयाँ
८) तीनकुने क्षेत्रको रुख, बिरुवा र रेलिङ तोडफोड गरेको – ४० हजार रुपैयाँ
९) तीनकुनेको आइल्याण्डमा तोडफोड गरेको – २३ हजार रुपैयाँ
