चैत ८, काठमाडौँ । ऊर्जा जलस्रोत तथा सिँचाइमन्त्री दीपक खड्काले लोडसेडिङको सुरुवात गरेका छन् । खड्काको उद्घोष अनुसार नै चैत २ गतेदेखि औद्योगिक क्षेत्रमा लोडसेडिङ हुन थालेको छ ।
भारतबाट १२ घण्टा मात्रै बिजुली आयात हुन थालेपछि देशभरका औद्योगिक क्षेत्रमा लोडसेडिङ हुन थालेको हो । भारतबाट १२ घण्टा मात्रै बिजुली आयात हुँदा नेपालका मुख्य औद्योगिक क्षेत्रमा यसको असर देखिएको हो । पछिल्ला पाँच दिनदेखि ठुला उद्योगहरू भएका वीरगञ्ज–पथलैया र सुनसरी–मोरङ औद्योगिक करिडोरका उद्योगमा १२ घण्टासम्म लोडसेडिङ सुरु भएको व्यवसायीहरूले गुनासो गरेका छन् । लोड व्यवस्थापनका लागि भन्दै नेपाल विद्युत् प्राधिकरणले १२ घन्टासम्म बिजुली काटेको उद्योगीहरूले बताएका छन् । जसले उद्योगको लागतसमेत बढ्नेमा उनीहरू चिन्तित हुन थालेका छन् । लोडसेडिङ बढेसँगै उद्योगको उत्पादनसमेत ५० प्रतिशतसम्म कटौती गर्न बाध्य हुनुपरेको उनीहरूले बताउन थालेका छन् ।
ऊर्जा मन्त्री खड्का र प्राधिकरणका कार्यकारी निर्देशक कुलमान घिसिङको आन्तरिक द्वन्द्वले अघोषित रूपमा लोडसेडिङको मार खेप्नुपरेको उनीहरूको गुनासो छ । यद्यपी घिसिङले भने लोडसेडिङ आउन नदिनेगरी काम गरिरहेको बताएका छन् । पाँच दिनबाट भइरहेको लोडसेडिङले उत्पादन घटेको र लागत बढेको वीरगञ्ज उद्योग वाणिज्य संघका अध्यक्ष अनिल कुमार अग्रवालले बताए । अघोषित लोडसेडिङले सबै उद्योगलाई समस्या हुन थालेको उनको भनाइ छ । ‘वीरगञ्ज औद्योगिक क्षेत्रमा विद्युत्को बिजोक भइरहेको छ,’ उनले गुनासो गरे ।
घरायसी ग्राहकको लाइन नकाट्ने तर उद्योगहरूमा काट्ने कुराले व्यवसायीलाई थप चिन्तित बनाएको अध्यक्ष अग्रवालले बताए । उद्योग र निजी क्षेत्रलाई राजनीतिबाट बाहिर राख्न पनि उनले आग्रह गरे । उनले राजनीतिक विवादबाट उद्योगी मर्कामा परेकाले सरकारले तत्काल विद्युत् आपूर्ति सहज बनाउनुपर्ने बताए ।
