चैत ५, काठमाडौं । क्रान्तिकारी कम्युनिस्ट पार्टी नेपालले देशैभर आज जनसम्बन्ध विस्तार अभियानको उद्घाटन गरेको छ । डेढ महिनासम्म सञ्चालन गरिने अभियानको उद्घाटन गर्दै क्रान्तिकारी कम्युनिस्ट पार्टी नेपालका कार्यवाहक महासचिव सीपी गजुरेलले आफूलाई जनयुद्धको तयारी गर्दाको जस्तै अनुभूति भइरहेको बताउनु भएको छ ।
उहाँले पार्टीको ९ नं. ब्यूरोको ललितपुरको लगनखेलमा अभियान उद्घाटन गर्दै जनयुद्धको तयारी गर्दा पनि यसरी नै साना साना कार्यक्रम देशैभर गर्ने गरेको र अहिलेको पार्टीको अवस्था जनयुद्धको तयारी गर्दाताकाको भन्दा धेरै नै ठूलो रहेको बताउनु भयो । आज देशमा जनताले वैकल्पिक राज्यसत्ता र व्यवस्था खोजेको र विद्यमान व्यवस्था यथास्थितिमा अगाडि जान नसक्ने अवस्था सिर्जना भएको भन्दै जनगणतन्त्रले मात्रै देशका सबै समस्याको समाधान गर्न सक्ने दावी गर्नुभयो ।
उहाँले भन्नुभयो, “देश बर्बाद भइरहेको छ । क्रान्ति गरिएन भने देशै गुम्ने स्थितिमा छ । यो देश बचाउन र देशका सबै समस्याको समाधान जनगणतन्त्रले मात्रै गर्न सक्छ ।” उहाँले देशमा क्रान्तिकारी, यथास्थितिवादी र पश्चगामी राजावादी शक्तिको अस्तित्व रहेको चर्चा गर्दै वर्तमान लोकतान्त्रिक गणतन्त्रको विकल्प जनगणतन्त्र मात्रै हुनसक्छ, राजतन्त्र कदापि हुन नसक्ने ठोकुवा गर्नुभयो ।
१८ वर्षसम्ममा पनि संसदवादी पार्टीहरुले देश र जनताको पक्षमा एउटा पनि राम्रो काम गर्न नसकेकोले जनतामा यो व्यवस्थाप्रति तीव्र असन्तुष्टी बढेको भन्दै अब अग्रगामी र क्रान्तिकारी शक्ति क्रान्तिकारी कम्युनिस्ट पार्टी नेपालले देशलाई अगाडि बढाउन जनगणतन्त्रको नारा अगाडि सारको बताउनु भयो । छरिएर रहेका क्रान्तिकारीहरुलाई गोलबन्द गर्दै अगाडि बढेका र देशको एकमात्र अग्रगामी र क्रान्तिकारी शक्ति आफूहरु रहेको दावी गर्दै उहाँले आम जनसमुदायलाई जनगणतन्त्रका लागि गरिने संघर्षमा साथ दिन अपील समेत गर्नुभयो ।
कार्यक्रममा नेताहरु दिनेश शर्मा सागर, सीताराम तामाङ, पवनमान श्रेष्ठ, चिन्तामणि पौडेल, प्रा.डा. जगदीशचन्द्र भण्डारी, अखिल (क्रान्तिकारी)का अध्यक्ष महेश श्रेष्ठ, महिला नेतृ सपना राजथला लगायतका नेताहरुले पनि अभियानको आवश्यकता र महत्वमाथि प्रकाश पार्नुभएको थियो ।
कार्यक्रमका प्रमुख अतिथि समेत रहनु भएका का.वा. महासचिव गजुरेलले पार्टीको झण्डा ९ नं. व्यूरोका इन्चार्ज र सेक्रेटरीलाई हस्तान्तरण गर्दै अभियानको उद्घाटन गर्नुभएको थियो । ९ नम्बर ब्युरोमा ब्युरो ईन्चार्ज दिनेश शर्मा र ब्यूरो सेक्रेटरी चिन्तामणी पौडेलको नेतृत्वमा दुई वटा अभियान टोली बनेको छ ।
कार्यक्रमको अध्यक्षता पार्टीको पिबिएम तथा ब्युरो सेक्रेटरी चिन्तामणी पौडेल, स्वागत बैकल्पिक केस सुरेश अधिकारी र सञ्चालन केस श्याम केसीले गर्नु भएको थियो ।
