फागुन ११, चितवन । मोटरसाइकल दुर्घटना हुँदा त्रिशूली नदीमा बेपत्ता भएका चालकको शव १० दिनपछि फेला परेको छ । चितवनको इच्छाकामना गाउँपालिका–५ कालिखोलामा डिभाइडरमा ठोक्किएर मोटरसाइकल दुर्घटना हुँदा त्रिशूली नदीमा मोटरसाइकल चालक लम्जुङ घर भएका २७ वर्षीय रोहित राना बेपत्ता भएका थिए । उनी भारतीय सेनामा कार्यरत (गोर्खा राइफल म्यान) रहेको पुष्टि भएको छ ।
इलाका प्रहरी कार्यालय मुग्लिनका प्रहरी निरीक्षक निरला भण्डारीले दिएको जानकारी अनुसार उनको शव घटनास्थलभन्दा सय मिटिर तल नदी किनारमा १० दिनपछि भेटिएको हो । आज बिहान माछा मार्ने माझीले देखेपछि प्रहरीलाई खबर गरेको भण्डारीले बताउनुभयो । शव परीक्षणका लागि भरतपुर अस्पतालको शवगृहमा राखिएको छ । परीक्षणपश्चात शव परिवारको जिम्मा लगाइनेछ ।
रानालाई खोज्न गर्न गोताखोर समेत परिचालन गरिएको थियो । सशस्त्र प्रहरी बलको विपद् व्यवस्थापन तालिम शिक्षालय कुरिनटारबाट सशस्त्र प्रहरी र जनपथ प्रहरीको टोलीले उनको शव नदीबाट बाहिर निकालेको छ । बा ००६–०२ प ९२०४ नम्बरको मोटरसाइकल आफैं अनियन्त्रित भएर दुर्घटना हुँदा राना सडकबाट अन्दाजी १५० मिटर तल त्रिशूली नदीमा खसेर बेपत्ता भएका थिए ।
