वैशाख १४, काठमाडौँ । एसीसी प्रिमियर कपमा समूह चरणका अन्तिम २ खेल बिहीबार हुने भएका छन् । काठमाडौँमा भइरहेको एसीसी प्रिमियर कपमा समूह ए मा रहेको घरेलु टोली नेपालले कतारसँग खेल्नेछ भने समूह बी मा हङकङ र कुवेतबीच खेल हुनेछ । यस खेलपछि सेमिफाइनल पुग्ने अन्तिम टोलीको टुङ्गो पनि लाग्नेछ भने समूह विजेता र उपविजेता पनि छिनोफानो हुनेछ ।
समूह ए बाट नेपाल र ओमानले सेमिफाइनलमा स्थान पक्का गरिसकेका छन् भने समूह बी बाट यूएईले पनि अन्तिम चारमा स्थान बनाइसकेको छ । सेमिफाइनल पुगिसकेका ३ वटै टिम ओडीआई मान्यता प्राप्त टोली हुन् । आगामी सेप्टेम्बरमा हुने एसिया कपको छनोटको रुपमा समेत रहेको यस प्रतियोगिताको विजेताले एसिया कप खेल्नेछ ।
