चैत १६, काठमाडौँ । क्रान्तिकारी कम्युनिस्ट पार्टी नेपालले राजतन्त्रको पुनस्थापनाका नाममा भएका तोडफोड, लुटपाट, निजी व्यवसाय तथा राष्ट्रिय उद्योगमा आगजनी सहित हिंसाको तीव्र निन्दा र भत्र्सना गरेको छ । पार्टीका कार्यवाहक महासचिव गौरवले जारी गरेको वक्तव्यमा विद्यमान र आसन्न संकटपूर्ण स्थितिको समाधान प्रतिगमन र यथास्थिति दुवै नभएर अग्रगमन तथा आमूल परिवर्तन हो, अर्थात् जनगणतन्त्रको स्थापना हो भनिएको छ ।
वक्तव्यमा भनिएको छ, ‘राजावादी शक्तिहरुद्वारा हिजो १५ गते आयोजित कार्यक्रम तोडफोड, लुटपाट, निजी व्यवसाय तथा राष्ट्रिय उद्योगमा आगजनी सहित हिंसामा बदलिएको छ । दुईजना युवाले अनाहकमा ज्यान गुमाएमा छन्, दर्जनौं व्यक्तिहरु घाइते भएका छन् । राजतन्त्रको पुनस्थापनाका नाममा भएका यी गतिविधिको हाम्रो पार्टीले तीव्र निन्दा तथा भत्र्सना गर्दछ र प्रतिगमन विद्यमान समस्याको समाधान होइन भन्ने तथ्यलाई पुनः दोहोर्याउन चाहन्छ ।
वक्तव्यमा अगाडि भनिएको छ, ‘देशमा यस प्रकारको स्थिति उत्पन्न हुनुमा प्रतिक्रियावादी सत्ता, संसदीय व्यवस्था र यथास्थितिका पक्षधर संसदवादी पार्टीहरुको असफलता जिम्मेवार छ । हिजोको अराजक गतिविधि संसदवादी शासकहरुका विरुद्धको जनआक्रोसलाई निरंकुश प्रतिगामी शक्तिहरुले गरेको नियोजित दुरुपयोगको परिणाम हो भने प्रहरी दमन तथा गोलीकाण्ड शासक वर्गमा पैदाभएको आतंकित मानसिकताको उपज हो । प्रतिगामी र यथास्थितिवादी शक्तिहरुका बीचको सत्ता स्वार्थको यो द्वन्द्वले देशलाई अझै गम्भीर संकटतर्फ धकेलिरहेको छ ।’
वक्तव्यको अन्त्यमा भनिएको छ, ‘विद्यमान र आसन्न संकटपूर्ण स्थितिको समाधान प्रतिगमन र यथास्थिति दुवै होइन, अग्रगमन तथा आमूल परिवर्तन हो, अर्थात् जनगणतन्त्रको स्थापना हो । यसका लागि प्रतिगामीहरुको उक्साहट र यथास्थितिवादीहरुको भ्रमबाट मुक्त भई अग्रगमनका लागि साथदिन हाम्रो पार्टी सम्पूर्ण देशभक्त, प्रगतिशील, वामपन्थी तथा क्रान्तिकारी शक्ति तथा व्यक्तित्वलाई हार्दिक आग्रह गर्दछ ।’
