साउन ७, काठमाडौँ । नेपाल कम्युनिस्ट पार्टीका संस्थापक महासचिव पुष्पलाल श्रेष्ठको आज ४५ औँ स्मृति दिवस देश तथा विदेशमा विभिन्न कार्यक्रमको आयोजना गरी मनाइँदैछ । विभिन्न कम्युनिस्ट पार्टी र उनीहरूको भातृ सङ्गठनले विभिन्न कार्यक्रमका साथ स्मृति दिवस मनाउन लागेका छन् ।
नेपाल कम्युनिस्ट पार्टीको स्थापना गर्ने संस्थापक महासचिव पुष्पलालको स्मृतिमा विभिन्न रचनात्मक, परोपकारमुलक, श्रम, सिर्जना र विमर्शात्मक कार्यक्रम आज देशभर हुँदैछन् । नेपालमा कम्युनिस्ट पार्टी स्थापना गर्दाखेरी निरञ्जन गोविन्द वैध, नारायण विलास जोशी, नर बहादुर कर्माचार्यलाई संस्थापक सदस्य हुन भने मोतिदेवीको बारेमा समेत एकथरी कम्युनिस्ट धाराले सस्थापक मान्दै आएका छन् ।
विसं २००६ मा भारतको कोलकतामा नेपाल कम्युनिस्ट पार्टीको स्थापना गर्दा पुष्पलालले सम्मुन्नत राष्ट्र निर्माण गर्ने र नेपाली जनताको वास्तविक मुक्तिको कार्यभार पूरा गर्ने लक्ष्य राखेका थिए । विसं १९८१ असारमा रामेछापको भङ्गेरीमा जन्मिका पुष्पलाल वैचारिकरूपले सशक्त र आम नेपालीका लागि एक प्रेरणादायी नेताका रूपमा परिचित हुनुहुन्छ । जनमतका हिसाबले ठूलो हिस्सा कम्युनिस्ट र वामपन्थी भएपछि विभिन्न टुक्रामा विभक्त हुँदा उनले देख्नुभएको सपना पूरा हुन नसकेको गुनासो कायमै छ ।
संस्थापक महासचिव श्रेष्ठले नेपालको परिवर्तनका लागि प्रस्ताव गरेको कृषिक्रान्ति र गरिब एवं गरिखाने वर्गको मुक्तिको अभियान अझै पनि उत्तिकै महत्त्वपूर्ण रहेको कम्युनिस्ट पार्टीका नेता तथा कार्यकर्ताहरूको भनाइ छ ।
